ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ಬೆಂಗಳೂರು, ಜೂ.24: ಹಲವು ಹಗರಣಗಳ ಆರೋಪಗಳಿಂದ ತುಂಬಿ ತುಳುಕುತ್ತಿರುವ ರಾಜ್ಯ ಬಿಜೆಪಿ ಸರಕಾರದಲ್ಲಿ ಆರೋಪ ಕೇಳಿಬಂದ ಕೂಡಲೇ ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡಿರುವ ಕಾನೂನು ಸಚಿವ ಸುರೇಶ್ ಕುಮಾರ್‌ರ ಅಪರೂಪದ ಕ್ರಮವನ್ನು ಸಿಪಿಐ(ಭಾರತ ಕಮ್ಯಿನಸ್ಟ್ ಪಕ್ಷ) ಸ್ವಾಗತಿಸಿದ್ದು, ಅವರ ರಾಜೀನಾಮೆ ಅಂಗೀಕರಿಸಲು ನಿರಾಕರಿಸಿದ ಮುಖ್ಯ ಮಂತ್ರಿಗಳ ನಿಲುವನ್ನು ಖಂಡಿಸಿದೆ. ಭ್ರಷ್ಟಾಚಾರಿ, ಅಧಿಕಾರಶಾಯಿ, ಸ್ವಜನ ಪಕ್ಷಪಾತಿಗಳ ಹಿಂಡಿನ ಮಧ್ಯೆ ಮೇಲ್ನೋಟಕ್ಕೆ ಸಜ್ಜನರಂತೆ ಕಾಣುತ್ತಿದ್ದ ಸುರೇಶ್ ಕುಮಾರ್ ವಿವಾದಕ್ಕೆ ಕಾರಣವಾದ ನಿವೇಶನವನ್ನು ಸ್ವತಃ ಹಿಂದಿರುಗಿಸಿ ಪಕ್ಷ ಹಾಗೂ ಸರಕಾರಕ್ಕೆ ಮುಜುಗರ ತಪ್ಪಿಸಲೆಂದು ನೀಡಿದ್ದ ರಾಜೀನಾಮೆಯನ್ನು ಅಂಗೀಕರಿಸಿ ತನಿಖೆಗೆ ಆದೇಶಿಸಬೇಕಿದ್ದ ಮುಖ್ಯ ಮಂತ್ರಿಗಳು, ಸಚಿವರ ರಾಜೀನಾಮೆ ಹಿಂಪಡೆಯುವಂತೆ ಅಂಗಲಾಚುವ ಮೂಲಕ ಜನರ ಮುಂದೆ ಸಣ್ಣವರಾಗಿ ದ್ದಾರೆ ಎಂದು ಸಿಪಿಐ ಅಭಿಪ್ರಾಯ ಪಟ್ಟಿದೆ ಎಂದು ಸಿಪಿಐ ರಾಜ್ಯ ಕಾರ್ಯ ದರ್ಶಿ ಪಿ.ವಿ.ಲೋಕೇಶ್ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಮುಖ್ಯಮಂತ್ರಿಗಳ ಈ ಹಿಂಜರಿಕೆಗೆ ಒಂದೋ ಸುರೇಶ್ ಕುಮಾರ್ ಮೇಲಿನ ಹಗರಣದ ಆರೋಪ ಹೊರಬರಲು ಬಿಜೆಪಿಯ ಆಂತರಿಕ ಕಿತ್ತಾಟ ಕಾರಣವಾಗಿರಬಹುದು. ಇಲ್ಲವೇ ತನ್ನ ಸಂಪುಟದಲ್ಲಿರುವ ಇತರ ಕಳಂಕಿತ ಮಂತ್ರಿಗಳ ವಿರುದ್ಧ ಇದೇ ಮಾನದಂಡ ಅನುಸರಿಸಬೇಕಾದ ಇಕ್ಕಟ್ಟಿನಿಂದ ತಪ್ಪಿಸಿಕೊಳ್ಳುವ ಕಾರಣರಬಹುದು. ಮೇಲ್ನೋಟಕ್ಕೆ ಕಾಣುವ ನೈತಿಕತೆಯ ಹಿನ್ನೆಲೆ ಎಂದು ಹೇಳಲಾಗುತ್ತಿರುವ ಈ ರಾಜೀನಾಮೆಯಿಂದ ಸದ್ಯದಲ್ಲಿ ನಿರೀಕ್ಷಿತ ಸಂಪುಟ ವಿಸ್ತರಣೆ ವೇಳೆ ಬಿಜೆಪಿ ನಾಯಕತ್ವ ತನ್ನ ಮಾದರಿ ನೈತಿಕತೆ ಅನುಸರಿಸುವ ಒತ್ತಡಕ್ಕೆ ಸಿಲುಕಿಸುವ ತಂತ್ರಗಾರಿಕೆ ಸುರೇಶ್ ಕುಮಾರ್ ರಾಜೀನಾಮೆಯ ಉದ್ದೇಶವಾಗಿದೆ ಎಂದು ಸಿಪಿಐ ರಾಜ್ಯ ಮಂಡಳಿ ವಿಶ್ಲೇಶಿದೆ.
ಇಂತಹ ಘಟನೆಗಳು ಮರುಕಳಿಸಿ ಆಡಳಿತ ಮತ್ತಷ್ಟು ಹದಗೆಟ್ಟು ಅತಂತ್ರ ಸ್ಥಿತಿ ನಿರ್ಮಾಣವಾಗುವ ಎಲ್ಲಾ ಸಾಧ್ಯತೆ ಗಳಿದ್ದು ಇದರ ನಿವಾರಣೆಗಾಗಿ ಮುಖ್ಯ ಮಂತ್ರಿಗಳು ವಿಧಾನಸಭೆ ವಿಸರ್ಜಿಸಿ ಹೊಸ ಜನಾದೇಶಕ್ಕೆ ಮುಂದಾಗ ಬೇಕೆಂದು ಪಕ್ಷ ಒತ್ತಾಯಿಸಿದೆ.