ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ದುಬೈ: ಇನ್ನು ಮೂರು ತಿಂಗಳ ಬಳಿಕ ವಲಸಿಗರಿಗೆ ಕಾರ್ಮಿಕ ಕಾರ್ಡ್‌ಗಳ ಅಗತ್ಯವಿಲ್ಲ ಎಂದು ಕಾರ್ಮಿಕ ಸಚಿವಾಲಯದ ವಕ್ತಾರರೊಬ್ಬರು ಹೇಳಿದ್ದಾರೆ.‘‘ದೇಶದಲ್ಲಿ ಕೆಲಸ ಮಾಡುವ ಯಾವುದೇ ಉದ್ಯೋಗಿಗೆ ಈ ದಾಖಲೆ ಈವರೆಗೆ ಅಗತ್ಯವಾಗಿತ್ತು. ಜೂನ್ ಬಳಿಕ ಕಾರ್ಮಿಕ ಕಾರ್ಡ್‌ಗಳನ್ನು ಹೊಂದುವ ಅಗತ್ಯವಿರುವುದಿಲ್ಲ. ಯಾಕೆಂದರೆ ಆ ವೇಳೆಗೆ ಕಾರ್ಮಿಕ ಕಾರ್ಡ್‌ಗಳ ಬದಲಿಗೆ ಎಮಿರೇಟ್ಸ್ ಐಡಿಯನ್ನು ವಿತರಿಸಲಾಗುತ್ತದೆ’’ ಎಂದು ಅವರು ತಿಳಿಸಿದರು.2012ರ ದ್ವಿತೀಯಾರ್ಧದಲ್ಲಿ ಕಾರ್ಮಿಕ ಕಾರ್ಡ್‌ಗಳ ಬದಲಿಗೆ ಎಮಿರೇಟ್ಸ್ ಕಾರ್ಡ್‌ಗಳನ್ನು ವಿತರಿಸಲಾಗುವುದು ಎಂದು ಈ ಮೊದಲು ಕಾರ್ಮಿಕ ಸಚಿವ ಸಕರ್ ಗೋಬಶ್ ಸಯೀದ್ ಗೋಬಶ್ ಹೇಳಿದ್ದರು.ಯುಎಇಯಲ್ಲಿರುವ ಎಲ್ಲ ವಲಸಿಗರು ನೋಂದಾಯಿಸಲ್ಪಟ್ಟಿದ್ದಾರೆ ಹಾಗೂ ಎಮಿರೇಟ್ಸ್ ಐಡಿಗೆ ಅರ್ಜಿ ಸಲ್ಲಿಸಿದ್ದಾರೆ ಎಂಬ ಬಗ್ಗೆ ಎಮಿರೇಟ್ಸ್ ನ್ಯಾಶನಲ್ ಐಡೆಂಟಿಟಿ ಅತಾರಿಟಿ (ಐಡಾ)ಗೆ ಖಾತರಿಯಾದ ಬಳಿಕ ನಿರ್ಧಾರವನ್ನು ಜಾರಿಗೊಳಿಸಲಾಗುವುದು ಎಂದು ಅವರು ಹೇಳಿದರು.

‘‘ದೇಶದಲ್ಲಿರುವ ಎಲ್ಲ ವಲಸಿಗರ ಐಡಿ ನೋಂದಣಿ ಪೂರ್ಣಗೊಂಡ ಬಳಿಕ ಕಾರ್ಮಿಕ ಕಾರ್ಡ್‌ಗಳನ್ನು ವಾಪಸ್ ಪಡೆದುಕೊಳ್ಳಲಾಗುವುದು ಹಾಗೂ ಅವುಗಳ ಬದಲಿಗೆ ಎಮಿರೇಟ್ಸ್ ಐಡಿಯನ್ನು ವಿತರಿಸಲಾಗುವುದು’’ ಎಂದರು.ಎಮಿರೇಟ್ಸ್ ಐಡಿಯನ್ನು ಕಾರ್ಮಿಕ ಕಾರ್ಡ್‌ಆಗಿ ಬಳಸುವುದು ವಲಸಿಗ ಕಾರ್ಮಿಕರಿಗೆ ಸುಲಭವಾಗಲಿದೆ. ‘‘ಈ ವರ್ಷದ ಜೂನ್‌ನಲ್ಲಿ ಐಡಿ ನೋಂದಣಿ ಪೂರ್ಣಗೊಂಡ ಬಳಿಕ ಅವರು ಹಲವು ಕಾರ್ಡ್‌ಗಳನ್ನು ಹೊತ್ತೊಯ್ಯವುದು ತಪ್ಪುತ್ತದೆ’’ ಎಂದು ವಕ್ತಾರರು ಹೇಳಿದರು.

ವಾಸ್ತವ್ಯ ವೀಸದ ಅವಧಿ ಈ ವರ್ಷ ಮುಗಿಯುವ ದುಬೈ ನಿವಾಸಿಗಳು ತಮ್ಮ ಐಡಿ ಕಾರ್ಡ್‌ಗಳನ್ನು ತಮ್ಮ ವೀಸ ನವೀಕರಣದ ಅವಧಿಯಲ್ಲಿ ನೋಂದಾಯಿಸಬಹುದು ಅಥವಾ ನವೀಕರಿಸಬಹುದು.ಶಾರ್ಜಾದಲ್ಲಿರುವ ವಲಸಿಗರು ತಮ್ಮ ಐಡಿ ಕಾರ್ಡ್‌ಗಳನ್ನು ಫೆಬ್ರವರಿ 1ರ ಮೊದಲು ನೋಂದಾಯಿಸಬೇಕೆಂದಿತ್ತು ಹಾಗೂ ನವೀಕರಿಸಬೇಕೆಂದಿತ್ತು. ಅಬುಧಾಬಿ ನಿವಾಸಿಗಳು ಎಪ್ರಿಲ್ 1ರ ಮೊದಲು ನವೀಕರಿಸಬೇಕು; ಹಾಗೂ ದುಬೈಯಲ್ಲಿ ವಾಸಿಸುವವರು ಜೂನ್ 1ರ ಮೊದಲು ಇದನ್ನು ಮಾಡಬೇಕು.ಖಾಸಗಿ ಕ್ಷೇತ್ರದಲ್ಲಿ ಕೆಲಸ ಮಾಡುವ ವಲಸಿಗರಿಗೆ ಎಮಿರೇಟ್ಸ್ ಐಡಿ ಎರಡು ವರ್ಷಗಳ ಕಾಲ ಸಿಂಧುವಾಗಿರುತ್ತದೆ. ಅವರ ಪ್ರಾಯೋಜಕತ್ವದಡಿಯಲ್ಲಿ ಬರುವ ಕುಟುಂಬ ಸದಸ್ಯರಿಗೂ ಇದೇ ಸಿಂಧುತ್ವ ಅವಧಿ ಅನ್ವಯಿಸುತ್ತದೆ.