ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ಅಬುಧಾಬಿ: ಹೊರಾಂಗಣ ಆಸನ ವ್ಯವಸ್ಥೆಯುಳ್ಳ ಕೆಫೆಗಳು ಮತ್ತು ರೆಸ್ಟೋರೆಂಟ್‌ಗಳು ಜನವಸತಿ ಪ್ರದೇಶದಿಂದ ಕನಿಷ್ಠ 30 ಮೀಟರ್ ದೂರ ಇರಬೇಕು ಹಾಗೂ ಪ್ರಾರ್ಥನಾ ಸ್ಥಳಗಳು, ಶಾಲೆಗಳು, ಆಸ್ಪತ್ರೆಗಳು ಮತ್ತು ಎಟಿಎಂಗಳ ಪಕ್ಕದಲ್ಲಿ ಇರಬಾರದು ಎಂದು ಅಬುಧಾಬಿ ಮುನಿಸಿಪಾಲಿಟಿ ಹೇಳಿದೆ.ಇಂಥ ಕೆಫೆಗಳು ಮತ್ತು ರೆಸ್ಟೋರೆಂಟ್‌ಗಳಿಂದ ಹೊರಹೊಮ್ಮುವ ಶಬ್ದದಿಂದ ಇವುಗಳಿಗೆ ತೊಂದರೆಯಾಗಬಾರದು ಎಂಬ ಉದ್ದೇಶದಿಂದ ಈ ನಿಯಮ ರೂಪಿಸಲಾಗಿದೆ.ಈ ಹೊರಾಂಗಣ ಆಸನ ವ್ಯವಸ್ಥೆ ವಾಹನಗಳ ಸುಗಮ ಸಂಚಾರಕ್ಕೆ ಅಡ್ಡಿಯಾಗಬಾರದು ಹಾಗೂ ಹೊರಾಂಗಣ ಆಸನ ವ್ಯವಸ್ಥೆಗೆ ಸಂಬಂಧಿಸಿದ ಕೈಪಿಡಿಗೆ ಅನುಗುಣವಾಗಿರಬೇಕು.ಮುನಿಸಿಪಾಲಿಟಿ ಅಧಿಕಾರಿಗಳು ಇತ್ತೀಚೆಗೆ ಕೈಗೊಂಡ ಸುರಕ್ಷತೆ ಮತ್ತು ಆರೋಗ್ಯ ತನಿಖೆ ವೇಳೆ ಈ ಅಂಶಗಳನ್ನು ಗುರುತಿಸಲಾಯಿತು. ನಗರದ ಸೌಂದರ್ಯ ಸೇವೆ ಅಂಗಡಿಗಳು, ಬ್ಯೂಟಿ ಪಾರ್ಲರ್‌ಗಳು, ದೋಬಿ ಅಂಗಡಿಗಳು ಮತ್ತು ರೆಸ್ಟೋರೆಂಟ್‌ಗಳ ಹೊರಾಂಗಣ ಆಸನ ವ್ಯವಸ್ಥೆಗಳಿಗೆ ಸಂಬಂಧಿಸಿದ ಆರೋಗ್ಯ ಮತ್ತು ಸುರಕ್ಷತಾ ಕ್ರಮಗಳ ಉಲ್ಲಂಘನೆಗಳ 113 ಪ್ರಕರಣಗಳನ್ನು ಅಧಿಕಾರಿಗಳು ಪತ್ತೆಹಚ್ಚಿದರು.

ಈ ವ್ಯಾಪಾರ ಮಳಿಗೆಗಳು ಆರೋಗ್ಯ ಮತ್ತು ಸುರಕ್ಷತಾ ಮಾನದಂಡಗಳನ್ನು ಅನುಸರಿಸಿ ಕೊಂಡು ಹೋಗುವುದನ್ನು ಖಾತರಿಪಡಿಸಲು ಸಂಜೆಯ ವೇಳೆಗೆ ತನಿಖಾ ಅಭಿಯಾನ ನಡೆಸಲಾಗುವುದು ಎಂದು ಮುನಿಸಿಪಾಲಿಟಿ ಹೇಳಿದೆ. ಇತ್ತೀಚೆಗೆ ನಡೆದ ತನಿಖೆಗೆ ಸಂಬಂಧಿಸಿ 74 ಪ್ರಕರಣಗಳಲ್ಲಿ ಎಚ್ಚರಿಕೆಯನ್ನೂ ನೀಡಲಾಗಿದೆ.ಪುರುಷರ ತಲೆಗೂದಲು ಕತ್ತರಿಸುವ ಸೆಲೂನ್‌ಗಳಲ್ಲಿ ಕ್ರಿಮಿನಾಶಕ ಉಪಕರಣಗಳನ್ನು ಬಳಸಲಾಗುತ್ತಿದೆಯೇ ಹಾಗೂ ಕರ್ತವ್ಯದ ಅವಧಿಯಲ್ಲಿ ಕೆಲಸಗಾರರು ಬಿಳಿ ಬಟ್ಟೆ ಧರಿಸಿದ್ದಾರೆಯೇ ಎಂಬುದನ್ನು ಪರಿಶೀಲಿಸಲಾಗುವುದು.

ಅದೇ ವೇಳೆ, ಸೆಲೂನ್ಗಳು ಮತ್ತು ಮಹಿಳೆಯರ ಬ್ಯೂಟಿಪಾರ್ಲರ್‌ಗಳಲ್ಲಿ ಬಳಸ ಲಾಗುವ ಉತ್ಪನ್ನಗಳು ಸುರಕ್ಷಿತವೇ ಎಂಬುದನ್ನು ತಪಾಸಣೆ ಗೊಳಪಡಿಸಲಾಗುವುದು.ದೋಬಿ ಅಂಗಡಿಗಳು ಬಟ್ಟೆಗಳನ್ನು ನೆಲದ ಮೇಲೆ ಬಿಡಬಾರದು ಹಾಗೂ ಅವುಗಳನ್ನು ಸಿಂಕ್‌ಗಳಲ್ಲಿ ಒಗೆಯ ಬಾರದು ಎಂದು ಮುನಿಸಿಪಾಲಿಟಿ ಹೇಳಿದೆ.ಅನ್ವಯವಾಗುವ ಆರೋಗ್ಯ ಮತ್ತು ಸುರಕ್ಷತಾ ಮಾನದಂಡಗಳನ್ನು ಅನುಸರಿಸುವಂತೆ ಮುನಿಸಿಪಾಲಿಟಿ ಅಧಿಕಾರಿಗಳು ಅಂಗಡಿ ಮಾಲಕರಿಗೆ ಕರೆ ನೀಡಿದ್ದಾರೆ. ಸಾಂಕ್ರಾಮಿಕ ರೋಗಗಳು ಹರಡದಂತೆ ನೋಡಿಕೊಳ್ಳುವುದಕ್ಕೆ ಈ ಕ್ರಮಗಳು ಅಗತ್ಯ ಎಂದು ಅವರು ಹೇಳಿದ್ದಾರೆ.