ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ಅಮ್ಮಾನ್, ಮೇ 10: ರಾಷ್ಟ್ರದಲ್ಲಿ ಬಹುಪಕ್ಷೀಯ ರಾಜಕೀಯ ವ್ಯವಸ್ಥೆಯನ್ನು ಉತ್ತೇಜಿಸುವ ಕಾನೂನೊಂದನ್ನು ಜೋರ್ಡಾನ್ ಸಂಸತ್ತು ಅಂಗೀಕರಿಸಿದೆ. ಜೋರ್ಡಾನ್‌ನಲ್ಲಿ ಈ ವರ್ಷಾಂತ್ಯದ ವೇಳೆಗೆ ಚುನಾವಣೆ ನಡೆಯಲಿರುವ ಸಂದರ್ಭದಲ್ಲೇ ಜೋರ್ಡಾನ್‌ನ ದೊರೆ ಎರಡನೆ ಅಬ್ದುಲ್ಲಾರು ಪ್ರಕಟಿಸಿರುವ ಪ್ರಮುಖ ಸುಧಾರಣೆಗಳಲ್ಲಿನ ಒಂದು ಕ್ರಮವು ಇದೀಗ ಕಾರ್ಯರೂಪಕ್ಕೆ ಬಂದಂತಾಗಿದೆ. ‘‘ರಾಷ್ಟ್ರವು ಪ್ರಸಕ್ತ ವರ್ಷದಲ್ಲಿ ತನ್ನ ಭವಿಷ್ಯದ ಬಗೆಗಿನ ಐತಿಹಾಸಿಕ ಅವಕಾಶವನ್ನು ಪಡೆಯಲಿದೆ’’ ಎಂದು ಸಂಸತ್ತನ್ನು ಉದ್ದೇಶಿಸಿ ಮಾತನಾಡಿದ ದೊರೆ ಅಬ್ದುಲ್ಲಾ ತಿಳಿಸಿದ್ದಾರೆ. ನ್ಯಾಯಯುತ ಹಾಗೂ ಪಾರದರ್ಶಕ ಸಂಸದೀಯ ಚುನಾವಣೆಯನ್ನು ಖಾತರಿಪಡಿಸುವ ಬಗ್ಗೆಯೂ ಅವರು ಭರವಸೆ ನೀಡಿದ್ದಾರೆ. ರಾಜಕೀಯ ವೌಲ್ಯಗಳನ್ನು ಆಧರಿಸಿದ ರಾಜಕೀಯ ಪಕ್ಷಗಳಿಗೆ ಚುನಾವಣೆಯಲ್ಲಿ ಸ್ಪರ್ಧಿಸುವ ಅವಕಾಶವನ್ನು ನೂತನ ಚುನಾವಣಾ ಕಾನೂನು ಒದಗಿಸಿಕೊಡಲಿದೆ.

ಈ ಮೊದಲಿನ ವ್ಯವಸ್ಥೆಯ ಪ್ರಕಾರ ಬುಡಕಟ್ಟುಗಳನ್ನು ಆಧರಿಸಿದ ಹಲವು ಸಣ್ಣ ಪಕ್ಷಗಳ ರಚನೆಗೆ ಅವಕಾಶ ಕಲ್ಪಿಸಲಾಗಿತ್ತು. ಹೊಸ ಕಾನೂನಿನಂತೆ ಚುನಾವಣೆಗೆ ರಾಷ್ಟ್ರದ ಆಂತರಿಕ ನಿಧಿಯಿಂದ ಖರ್ಚು ಮಾಡಬೇಕಾಗುತ್ತದೆಯಲ್ಲದೆ, ಅದು ಪಕ್ಷಗಳು ವಿದೇಶಿ ನೆರವನ್ನು ಪಡೆಯುವುದನ್ನು ನಿರ್ಬಂಧಿಸುತ್ತದೆ. ರಾಜಕೀಯ ಪಕ್ಷಗಳ ಚಲನವಲನ ಹಾಗೂ ಹಣಕಾಸು ವ್ಯವಹಾರದ ದಾಖಲೆಗಳನ್ನು ಪರಿಶೀಲಿಸಲು ಸರಕಾರಕ್ಕೆ ಅಧಿಕಾರ ನೀಡುವುದು ಸೇರಿದಂತೆ ಇದೇ ರೀತಿಯ ಹಲವು ನಿರ್ಬಂಧಗಳನ್ನು ನೂತನ ಕಾನೂನಿನನ್ವಯ ರದ್ದುಪಡಿಸಲಾಗಿದೆ. ರಾಷ್ಟ್ರದಲ್ಲಿ ಇದೊಂದು ಪ್ರಗತಿಯ ಹೆಜ್ಜೆಯಾಗಿದೆ ಎಂದು ಪ್ರಮುಖ ವಿಪಕ್ಷ ಮುಸ್ಲಿಂ ಬ್ರದರ್‌ಹುಡ್ ನೂತನ ಕ್ರಮದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದೆ.