ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ಮೈಸೂರು, ಎ.18: ಹುಣಸೂರಿನಲ್ಲಿ ತಮಿಳುನಾಡು ಮೂಲದ ವ್ಯಾಪಾರಿ ತಾಜುದ್ದೀನ್ ಎಂಬರನ್ನು ಹತ್ಯೆಗೈದು ಆತನ ದ್ವಿಚಕ್ರ ವಾಹನವನ್ನು ಅಪಹರಿಸಿದ್ದ ಆರೋಪಿಯನ್ನು ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಬಂಧಿತನನ್ನು ಹುಣಸೂರಿನ ಲಾಲಾಬಂದ್ ಬೀದಿಯ ನಿವಾಸಿ ಶಿವು ಎಂದು ಗುರುತಿಸಲಾಗಿದ್ದು ಮತ್ತೋರ್ವ ಆರೋಪಿ ಸುರೇಶ್ ತಲೆಮರೆಸಿಕೊಂಡಿದ್ದಾರೆ.

ಈ ಇಬ್ಬರು ಕಳೆದ ಜನವರಿ 26ರಂದು ರಾತ್ರಿ 9:30ರಲ್ಲಿ ಹುಣಸೂರಿನ ಕಂಚಿನಕೆರೆ ಹೊಸಕೋಟೆ ರಸ್ತೆಯ ಡಿ.ಎಲ್.ಬಾರ್ ಹಿಂಭಾಗ ತಾಜುದ್ದೀನ್‌ರನ್ನು ಕರೆಸಿ ಆತನ ಮೇಲೆ ಹಲ್ಲೆ ನಡೆಸಿ, ಕಲ್ಲಿನಿಂದ ಜಜ್ಜಿ ಕೊಲೆ ಮಾಡಿದ ಬಳಿಕ ಶವವನ್ನು ಸುಟ್ಟು, ದ್ವಿಚಕ್ರ ವಾಹನವನ್ನು ಅಪಹರಿಸಿದ್ದರು. ನಂತರ ಅಪಹರಿಸಿದ ಬೈಕಿಗೆ ನಕಲಿ ನಂಬರ್ ಹಾಕಿಕೊಂಡು ಓಡಾಡುತ್ತಿದ್ದರು. ಈ ಬೈಕನ್ನು ಮಾರಲು ಶಿವು ಯತ್ನಿಸುತಿದ್ದಾಗ ಅನೇಕ ಸಾಕ್ಷ್ಯಾಧಾರಗಳನ್ನು ಸಂಗ್ರಹಿಸಿ ಕಾರ್ಯಾಚರಣೆಗೆ ಮುಂದಾದ ಪೊಲೀಸರು ಆರೋಪಿಯನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಬಂಧಿತನಿಂದ ಕೃತ್ಯಕ್ಕೆ ಬಳಸಿದ ಆಟೋರಿಕ್ಷಾ ಮತ್ತು ಅಪಹರಿಸಿದ್ದ ಬೈಕನ್ನು ವಶಕ್ಕೆ ಪಡೆದಿದ್ದಾರೆ.

ಸಿಪಿಐ ಗಜೇಂದ್ರ ಪ್ರಸಾದ್‌ರ ತನಿಖಾ ತಂಡದಲ್ಲಿ ಇನ್ಸ್‌ಪೆಕ್ಟರ್ ಆರ್.ಪಿ. ಅಶೋಕ್, ಪಿ.ಎಸ್.ಐ. ಹರಿವರ್ಧನ್, ಜೀವನ್, ಸಿಬ್ಬಂದಿ ಸುರೇಶ್, ಸದಾಶಿವ, ವಸಂತಕುಮಾರ್, ಪ್ರಭಾಕರ್, ಮಹೇಶ, ರಾಜು, ಮನೋಹರ, ಮಂಜುನಾಥ್, ವಸಂತ್ ಕುಮಾರ್ ರವರು ಕಾರ್ಯ ನಿರ್ವಹಿಸಿದ್ದರು. ಪತ್ತೆ ಕಾರ್ಯದಲ್ಲಿದ್ದ ಪೊಲೀಸ್ ಅಧಿಕಾರಿ ಮತ್ತು ಸಿಬ್ಬಂದಿಗೆ ಪೊಲೀಸ್ ಅಧೀಕ್ಷಕರು ಸೂಕ್ತ ಬಹುಮಾನ ಘೋಷಿಸಿದ್ದಾರೆ. ಹಾಗೂ ತಲೆ ಮರೆಸಿಕೊಂಡಿರುವ ಆರೋಪಿ ಸುರೇಶ್‌ನ ಪತ್ತೆಗೆ ಮಾಹಿತಿ ನೀಡುವ ಸಾರ್ವಜನಿಕರಿಗೆ ಸೂಕ್ತ ಬಹುಮಾನ ನೀಡಲಾಗುವುದೆಂದು ತಿಳಿಸಿರುತ್ತಾರೆ.