ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ಕುಡಂಕುಳಂ, ಸೆ.11:ಪೊಲೀಸ್ ಗೋಲಿಬಾರ್‌ಗೆ ಓರ್ವ ಮೀನುಗಾರ ಬಲಿಯಾದ ಒಂದು ದಿನದ ಬಳಿಕ ಇಂದು ಕುಡಂಕುಳಂ ಅಣು ವಿದ್ಯುತ್ ಸ್ಥಾವರ ಪರಿಸರದಲ್ಲಿ ಶ್ಮಶಾನ ಮೌನ ನೆಲೆಸಿದೆ. ಕುಡಂಕುಳಂ ಪರಮಾಣು ವಿದ್ಯುತ್ ಯೋಜನೆ ವಿರೋಧಿ ಕಾರ್ಯಕರ್ತರ ವಿರುದ್ಧ ಪೊಲೀಸ್ ಹಿಂಸಾಚಾರವನ್ನು ಪ್ರತಿಭಟಿಸಿ ಪ್ರತಿಭಟನೆಯ ಕೇಂದ್ರಬಿಂದುವಾದ ಇದಿಂತಕಾರಯ್‌ಯಲ್ಲಿ ನಡೆಸುತ್ತಿರುವ ಸರಣಿ ಉಪವಾಸ ಮುಷ್ಕರವನ್ನು ಪ್ರತಿಭಟನಕಾರರು ಮುಂದುವರಿಸಿದ್ದಾರೆ. ಅದೇ ವೇಳೆ, ಪರಿಸರದಲ್ಲಿ ಪೊಲೀಸರು ಬಿಗು ಭದ್ರತೆಯನ್ನು ಏರ್ಪಡಿಸಿದ್ದಾರೆ.ಪರಿಸ್ಥಿತಿ ಶಾಂತವಾಗಿದೆ ಎಂದು ಪೊಲೀಸರು ಇಲ್ಲಿ ತಿಳಿಸಿದರು. ಆದರೆ, ಪೊಲೀಸರು ಇಲ್ಲಿನ ಪರಿಸ್ಥಿತಿಯ ಮೇಲೆ ತೀವ್ರ ನಿಗಾ ಇರಿಸಿದ್ದಾರೆ. “ಭದ್ರತೆಯನ್ನು ಹೆಚ್ಚಿಸಲಾಗಿದೆ” ಎಂದು ಮೂಲಗಳು ತಿಳಿಸಿವೆ.ಸ್ಥಾವರದ ವಿರುದ್ಧ ಪ್ರತಿಭಟನೆಯ ನೇತೃತ್ವ ವಹಿಸಿರುವ ಪರಮಾಣು ವಿದ್ಯುತ್ ವಿರುದ್ಧ ಜನರ ಚಳವಳಿಯ ಸಂಚಾಲಕ ಎಸ್.ಪಿ. ಉದಯ ಕುಮಾರ್ ಮತ್ತು ಪುಷ್ಪರಾಯನ್ ಸೇರಿದಂತೆ ಚಳವ ಳಿಯ ಪ್ರಮುಖ ನಾಯಕರು ಇಂದು ರಾತ್ರಿ ಕುಡಂಕುಳಂ ಪೊಲೀಸ್ ಠಾಣೆಗೆ ಬಂದು ಬಂಧನಕ್ಕೊಳ ಗಾಗುವರು ಎಂದು ಉದಯಕುಮಾರ್‌ಗೆ ನಿಕಟ ವಾಗಿರುವ ಮೂಲಗಳು ತಿಳಿಸಿವೆ.

ಪರಮಾಣು ಸ್ಥಾವರ ವಿರುದ್ಧದ ಹೋರಾಟ ನಿನ್ನೆ ಹಿಂಸೆಗೆ ತಿರುಗಿತ್ತು. ಪ್ರತಿಭಟನಕಾರರು ತೂತುಕುಡಿ ಜಿಲ್ಲೆಯ ಮನ ಪಾಡ್‌ನಲ್ಲಿನ ಪೊಲೀಸ್ ಠಾಣೆಯೊಂದರ ಮೇಲೆ ದಾಳಿ ನಡೆಸಲು ಯತ್ನಿಸಿದಾಗ ಪೊಲೀಸರು ನಡೆಸಿದ ಗೋಲಿಬಾರ್‌ನಲ್ಲಿ ಒಬ್ಬ ವ್ಯಕ್ತಿ ಮೃತಪಟ್ಟಿದ್ದಾರೆ.ಇಂದಿಂತಕಾರಯ್ ಮತ್ತು ಸುತ್ತಮುತ್ತಲ ಗ್ರಾಮಗಳಿಗೆ ಸೀಮಿತವಾಗಿ ಒಂದು ವರ್ಷ ಕಾಲ ನಡೆದ ಪರಮಾಣು ವಿದ್ಯುತ್ ಸ್ಥಾವರದ ವಿರುದ್ಧದ ಹೋರಾಟ, ಸ್ಥಾವರಕ್ಕೆ ಯುರೇನಿಯಂ ಇಂಧನ ತುಂಬಿಸುವುದಾಗಿ ಅಧಿಕಾರಿಗಳು ಘೋಷಿಸಿದ ಬಳಿಕ ನೆರೆಯ ತೂತುಕುಡಿ ಜಿಲ್ಲೆಗೂ ಹಬ್ಬಿದೆ.

ಇಂದಿಂತಕಾರಯ್ ಗ್ರಾಮದ ಸಮುದ್ರ ತೀರ ನಿನ್ನೆ ರಣರಂಗವಾಗಿತ್ತು. ಇಲ್ಲಿ ಪೊಲೀಸರು ಮತ್ತು ಪ್ರತಿಭಟನಕಾರರು ಸಂಘರ್ಷಕ್ಕಿಳಿದರು. ಪೊಲೀಸರು ಪ್ರತಿಭಟನಕಾರರ ಮೇಲೆ ಬೆತ್ತಪ್ರಯೋಗ ಮಾಡಿದರು ಹಾಗೂ ಅಶ್ರುವಾಯು ಶೆಲ್‌ಗಳನ್ನು ಸಿಡಿಸಿದರು.ಪೊಲೀಸ್ ಕ್ರಮವನ್ನು ಖಂಡಿಸಿ ಪರಮಾಣು ವಿದ್ಯುತ್ ವಿರುದ್ಧದ ಜನರ ಚಳವಳಿ ನಿನ್ನೆಯಿಂದ ೪೮ ಗಂಟೆಗಳ ಸರಣಿ ಉಪವಾಸ ನಡೆಸುತ್ತಿದೆ.