ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ಹೊಸದಿಲ್ಲಿ, ಸೆ11: ನ್ಯಾಯಾಲಯದಲ್ಲಿರುವ ಪ್ರಕರಣಗಳನ್ನು ವರದಿ ಮಾಡುವುದಕ್ಕೆ ಸಂಬಂಧಿಸಿ ಸಾರಾಸಗಟು (ಎಲ್ಲರಿಗೂ ಸಮಾನವಾಗಿ ಅನ್ವಯವಾಗುವ) ಮಾರ್ಗದರ್ಶಿ ಸೂತ್ರಗಳನ್ನು ರೂಪಿಸಲು ಸುಪ್ರೀಂ ಕೋರ್ಟ್ ಇಂದು ನಿರಾಕರಿಸಿದೆ. ಆದರೆ,ಸಾಂವಿಧಾನಿಕ ತತ್ವವೊಂದನ್ನು ಅನುಷ್ಠಾನಗೊಳಿಸಿದ್ದು, ಅದರ ಪ್ರಕಾರ ನ್ಯಾಯಾಲಯದ ವಿಚಾರಣೆಗಳಿಗೆ ಸಂಬಂಧಿಸಿದ ವರದಿಗಳ ಪ್ರಕಟನೆಯನ್ನು ಮುಂದೂಡುವಂತೆ ಸಂತ್ರಸ್ತ ಪಕ್ಷಗಳು ಕೋರಬಹುದಾಗಿದೆ. ನ್ಯಾಯಾಲಯಗಳಲ್ಲಿ ನಡೆಯುವ ವಿಚಾರಣೆಗಳಿಗೆ ಸಂಬಂಧಿಸಿದ ವರದಿಗಳ ಪ್ರಕಟನೆಯನ್ನು ಮುಂದೂಡುವಂತೆ ಸಂಬಂಧಪಟ್ಟ ನ್ಯಾಯಾಲಯ ಗಳನ್ನು ಕೋರಲು ಸಂತ್ರಸ್ತ ಪಕ್ಷಗಳಿಗೆ ಅವಕಾಶ ಮಾಡಿಕೊಡುವ ಸಾಂವಿಧಾನಿಕ ತತ್ವವನ್ನು ಅನುಷ್ಠಾನಗೊಳಿಸುತ್ತಿರುವು ದಾಗಿ ಮುಖ್ಯ ನ್ಯಾಯಾಧೀಶ ಎಸ್.ಎಚ್.ಕಪಾಡಿಯಾ ನೇತೃತ್ವದ ಐವರು ನ್ಯಾಯಾಧೀಶರ ನ್ಯಾಯಪೀಠ ತಿಳಿಸಿದೆ. ನ್ಯಾಯಾಲಯ ಕಲಾಪಗಳ ಮುಂದೂಡಿಕೆಯ ಪ್ರಶ್ನೆಯನ್ನು ಪ್ರತಿಯೊಂದು ಪ್ರಕರಣದ ಆಧಾರದಲ್ಲಿ ಸಂಬಂಧಪಟ್ಟ ನ್ಯಾಯಾಲಯವು ಇತ್ಯರ್ಥಪಡಿಸುವುದು ಎಂದು ಪೀಠ ಹೇಳಿತು.

“ನಾವು ಮಾರ್ಗದರ್ಶಿ ಸೂತ್ರಗಳನ್ನು ರೂಪಿಸುತ್ತಿಲ್ಲ. ಬದಲಿಗೆ ಸಾಂವಿಧಾನಿಕ ತತ್ವವನ್ನು ಜಾರಿಗೊಳಿಸುತ್ತಿದ್ದೇವೆ. ವರದಿ ಪ್ರಕಟನೆ ಮುಂದೂಡಿಕೆ ಆದೇಶವನ್ನು ಯಾವಾಗ ಹೊರಡಿಸಬೇಕೆನ್ನುವುದನ್ನು ಪ್ರತಿ ಪ್ರಕರಣದ ಆಧಾರದಲ್ಲಿ ನ್ಯಾಯಾಲಯಗಳು ನಿರ್ಧರಿಸುತ್ತವೆ” ಎಂದು ಪೀಠ ಹೇಳಿತು. ಪೀಠದಲ್ಲಿ ನ್ಯಾ. ಕಪಾಡಿಯ ಅವರಲ್ಲದೆ, ನ್ಯಾ. ಡಿ.ಕೆ. ಜೈನ್, ನ್ಯಾ. ಎಸ್.ಎಸ್. ನಿಜ್ಜರ್, ನ್ಯಾ. ರಂಜನಾ ಪ್ರಕಾಶ್ ದೇಸಾಯಿ ಮತ್ತು ನ್ಯಾ. ಜೆ.ಎಸ್. ಖೇಹರ್ ಇದ್ದರು.ನ್ಯಾಯಾಲಯ ಕಲಾಪಗಳ ಕುರಿತ ಸುದ್ದಿ ಪ್ರಕಟನೆಯನ್ನು ಮುಂದೂಡುವ ಬಗ್ಗೆ ಪ್ರಸ್ತಾಪಿಸಿದ ನ್ಯಾಯಾಲಯ, ಈ ಕ್ರಮ ಪ್ರತಿಬಂಧಕವೇ ಹೊರತು, ನಿಷೇಧಾತ್ಮಕ ಅಥವಾ ಶಿಕ್ಷಾ ಕ್ರಮವಲ್ಲ ಎಂದು ಅಭಿಪ್ರಾಯಪಟ್ಟಿತು.

ವಾಕ್ ಸ್ವಾತಂತ್ರ ಮತ್ತು ಪ್ರಭಾವಶಾಲಿ ನ್ಯಾಯ ನೀಡಿಕೆಯನ್ನು ಖಾತರಿಪಡಿಸುವ ನ್ಯಾಯೋಚಿತ ವಿಚಾರಣೆಯ ನಡುವೆ ಸಮತೋಲನವನ್ನು ಸಾಧಿಸುವುದಕ್ಕಾಗಿ ಕಲಾಪಗಳ ವರದಿಗಾರಿಕೆಯ ಮೇಲೆ ತಾತ್ಕಾಲಿಕ ನಿಷೇಧ ಅಗತ್ಯವಾಗಿದೆ ಎಂದು ಸುಪ್ರೀಂ ಕೋರ್ಟ್ ಹೇಳಿತು.