ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ಜಿನಿವಾ,ಎ.10:ವಿಶ್ವಸಂಸ್ಥೆ ಹಾಗೂ ಅರಬ್ ಲೀಗ್‌ನ ಪ್ರತಿನಿಧಿ ಕೋಫಿ ಅನ್ನಾನ್ ಸಿರಿಯ ಬಿಕ್ಕಟ್ಟಿಗೆ ಸಂಬಂಧಿಸಿ ಭದ್ರತಾಮಂಡಳಿಗೆ ಪತ್ರವೊಂದನ್ನು ರವಾನಿಸಲಿದ್ದಾರೆ ಎಂದು ಅನ್ನಾನ್ ವಕ್ತಾರ ತಿಳಿಸಿದ್ದಾರೆ.‘‘ಕದನ ವಿರಾಮದ ಜಾರಿಗೆ ಅಂತಿಮ ಗಡುವಾಗಿರುವ ಗುರುವಾರಕ್ಕೆ ಮುನ್ನವೇ ಉದ್ವಿಗ್ನ ಪ್ರದೇಶಗಳಿಂದ ಸರಕಾರಿ ಸೇನಾ ಪಡೆಗಳನ್ನು ಹಿಂದೆಗೆಯುವುದಾಗಿ ಅನ್ನಾನ್‌ರೊಂದಿಗಿನ ಮಾತುಕತೆ ವೇಳೆ ಸಿರಿಯ ಆಡಳಿತ ಒಪ್ಪಿಕೊಂಡಿದೆ’’ ಎಂದು ವಕ್ತಾರ ಅಹ್ಮದ್ ಫೌಝಿ ಎಎಫ್‌ಪಿ ಸುದ್ದಿಸಂಸ್ಥೆಗೆ ತಿಳಿಸಿದ್ದಾರೆ. ಸಿರಿಯ ಆಡಳಿತವು ಇನ್ನೂ ಹಲವು ಪ್ರದೇಶಗಳಿಂದ ತನ್ನ ಸೇನಾಪಡೆಗಳನ್ನು ಹಿಂದೆಗೆಯಬೇಕಾಗಿದೆ ಎಂದು ಇದೇ ವೇಳೆ ಬ್ರಿಟನ್ ಮೂಲದ ಸಿರಿಯದ ಮಾನವ ಹಕ್ಕು ಸಂಘಟನೆ ಹೇಳಿಕೊಂಡಿದೆ. ಕಳೆದ ಮಾರ್ಚ್‌ನಲ್ಲಿ ಪ್ರಾರಂಭಗೊಂಡ ಸಿರಿಯದಲ್ಲಿನ ಸಂಘರ್ಷದ ಪರಿಣಾಮ ನಿರಾಶ್ರಿತರಾಗಿರುವ ಸುಮಾರು 25 ಸಾವಿರ ಜನರು ಪ್ರಸಕ್ತ ಸಿರಿಯ ಗಡಿಭಾಗಕ್ಕೆ ಹೊಂದಿಕೊಂಡಿರುವ ಟರ್ಕಿಯ ಮೂರು ಪ್ರಾಂತಗಳಲ್ಲಿ ಶಿಬಿರ ಹೂಡಿದ್ದಾರೆ ಎಂದವರು ವಿವರಿಸಿದ್ದಾರೆ. ವಿಶ್ವಸಂಸ್ಥೆ ಒದಗಿಸಿರುವ ಅಂಕಿಅಂಶಗಳ ಪ್ರಕಾರ ಸಿರಿಯ ಹಿಂಸಾಚಾರಕ್ಕೆ ಇದುವರೆಗೆ ಸುಮಾರು ಒಂಭತ್ತು ಸಾವಿರಕ್ಕೂ ಅಧಿಕ ಜನರು ಪ್ರಾಣ ತೆತ್ತಿದ್ದಾರೆ.