ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ಮುಂಬೈ, ಜು.9: ಗುಜರಾತ್‌ನ ಬೆಸ್ಟ್ ಬೇಕರಿ ಪ್ರಕರಣದಲ್ಲಿ ಬಾಂಬೆ ಹೈಕೋರ್ಟ್ ಇಂದು ಸಾಕ್ಷಗಳ ಕೊರತೆಯಿಂದ ಐವರು ಆರೋಪಿಗಳನ್ನು ಖುಲಾಸೆಗೊಳಿಸಿದ್ದು, ಇತರ ನಾಲ್ವರಿಗೆ ಜೀವಾವಧಿ ಶಿಕ್ಷೆ ವಿಧಿಸಿರುವ ವಿಚಾರಣಾ ನ್ಯಾಯಾಲಯದ ಆದೇಶವನ್ನು ಎತ್ತಿ ಹಿಡಿದಿದೆ.ವಿಚಾರಣಾ ನ್ಯಾಯಾಲಯದ ವಿರುದ್ಧ ಆರೋಪಿಗಳು ಸಲ್ಲಿಸಿದ್ದ ಮೇಲ್ಮನವಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿಗಳಾದ ವಿ.ಎಂ.ಕಾನಡೆ ಹಾಗೂ ಪಿ.ಡಿ.ಕೋಡೆಯವರಿದ್ದ ವಿಭಾಗೀಯ ಪೀಠವೊಂದು ತೀರ್ಪನ್ನು ಮರು ಪರಿಶೀಲಿಸಿ ಜು.3ರಂದು ಸಂಜಯ್ ಠಕ್ಕರ್, ಬಹಾದ್ದೂರ್ ಸಿಂಗ್ ಚೌಹಾಣ್, ಸನಾಭಾಯಿ ಬರಿಯಾ ಹಾಗೂ ದಿನೇಶ್ ರಾಜಭರ್ ಎಂಬವರ ಜೀವಾವಧಿ ಶಿಕ್ಷೆಯನ್ನಷ್ಟೇ ಎತ್ತಿ ಹಿಡಿಯಿತು. ನ್ಯಾಯ ಮೂರ್ತಿಗಳು ದಂಗೆಯಲ್ಲಿ ಗಾಯಗೊಂಡಿದ್ದ ನಾಲ್ವರು ಬೆಸ್ಟ್ ಬೇಕರಿ ನೌಕರರ ಸಾಕ್ಷವನ್ನು ನಂಬಿದೆ. ಅವರು ಆರೋಪಿಗಳನ್ನು ಗುರುತಿಸಿದ್ದರು. ಹಾಗೂ ಈ ಆರೋಪಿಗಳು ದಂಗೆಯ ವೇಳೆ ಮಾರಕಾಯುಧಗಳೊಂದಿಗೆ ಸ್ಥಳದಲ್ಲಿದ್ದರೆಂದು ಸಾಕ್ಷ ನುಡಿದಿದ್ದರು.

ಆದಾಗ್ಯೂ, ವಿಚಾರಣಾ ನ್ಯಾಯಾಲಯದ ಆದೇಶವನ್ನು ತಳ್ಳಿ ಹಾಕಿದ ಹೈಕೋರ್ಟ್ ಪೀಠ, ರಾಜುಭಾಯಿ ಬರಿಯಾ, ಪಂಕಜ್ ಗೋಸಾವಿ, ಜಗದೀಶ್ ರಾಜಪುತ್, ಸುರೇಶ್ ಅಲಿಯಾಸ್ ಲಾಲೊ ದೇವಜಿ ಭಾಯಿ ವಾಸವ ಹಾಗೂ ಶೈಲೇಶ್ ತಡ್ರಿ ಎಂಬವರನ್ನು ಸಾಕ್ಷಗಳ ಕೊರತೆಯ ಕಾರಣ ಬಿಡುಗಡೆಗೊಳಿಸಿದೆ.2002ರ ಗುಜರಾತ್ ದಂಗೆಯ ವೇಳೆ ವಡೋದರಾದ ಬೆಸ್ಟ್ ಬೇಕರಿಯಲ್ಲಿ ದುಷ್ಕರ್ಮಿಗಳು 14 ಮಂದಿಯನ್ನು ಸಜೀವವಾಗಿ ದಹಿಸಿದ್ದರು.