ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ಹೊಸದಿಲ್ಲಿ, ಸೆ. 11: ವಿಶ್ವಸಂಸ್ಥೆಯ ಪೂರ್ಣ ಹಾಗೂ ಸಮಾನ ಸದಸ್ಯತ್ವವನ್ನು ಪಡೆಯುವ ಫೆಲೆಸ್ತೀನ್‌ನ ಪ್ರಯತ್ನಕ್ಕೆ ನಿರಂತರ ಬೆಂಬಲ ನೀಡುವುದಾಗಿ ಪ್ರಧಾನಿ ಮನಮೋಹನ್ ಸಿಂಗ್ ಮಂಗಳವಾರ ಹೇಳಿದ್ದಾರೆ. “ಯುನೆಸ್ಕೊದಲ್ಲಿ ಪೂರ್ಣ ಸದಸ್ಯತ್ವ ಸ್ಥಾನಮಾನವನ್ನು ಪಡೆಯುವ ಫೆಲೆಸ್ತೀನ್ ರಾಷ್ಟ್ರದ ಪ್ರಯತ್ನಗಳನ್ನು ನಿರಂತರವಾಗಿ ಬೆಂಬಲಿಸುವ ಮೂಲಕ ಭಾರತ ಸಕ್ರಿಯ ಪಾತ್ರ ವಹಿಸಿತ್ತು. ವಿಶ್ವಸಂಸ್ಥೆಯ ಪೂರ್ಣ ಹಾಗೂ ಸಮಾನ ಸದಸ್ಯತ್ವವನ್ನು ಪಡೆಯುವ ಫೆಲೆಸ್ತೀನ್‌ನ ಪ್ರಯತ್ನಗಳನ್ನೂ ನಾವು ನಿರಂತರವಾಗಿ ಬೆಂಬಲಿಸುತ್ತೇವೆ” ಎಂದು ಫೆಲೆಸ್ತೀನ್ ಅಧ್ಯಕ್ಷ ಮಹ್ಮೂದ್ ಅಬ್ಬಾಸ್ ನೀಡಿದ ಅಧಿಕೃತ ಭೇಟಿಯ ಸಂದರ್ಭದಲ್ಲಿ ಹೇಳಿಕೆಯೊಂದನ್ನು ಬಿಡುಗಡೆ ಮಾಡಿದ ಪ್ರಧಾನಿ ಹೇಳಿದರು.“ಫೆಲೆಸ್ತೀನ್ ಮತ್ತು ಇಸ್ರೇಲ್ ನಡುವೆ ಶೀಘ್ರವೇ ಶಾಂತಿ ಮಾತುಕತೆ ಆರಂಭಗೊಳ್ಳುವುದನ್ನು ಭಾರತ ಎದುರು ನೋಡುತ್ತಿದೆ. ಇದು ಉಭಯ ಬಣಗಳು ವ್ಯಾಪಕ ತಳಹದಿಯ ತಿಳುವಳಿಕೆಯೊಂದಕ್ಕೆ ಬರಲು ಸಹಾಯ ಮಾಡಲಿದೆ ಎಂಬ ವಿಶ್ವಾಸ ನಮಗಿದೆ” ಎಂದರು.

ಭಾರತ ಪ್ರವಾಸದಲ್ಲಿರುವ ಫೆಲೆಸ್ತೀನ್ ಅಧ್ಯಕ್ಷರೊಂದಿಗೆ ತಾನು ಅತ್ಯಂತ ಫಲಪ್ರದ ಮಾತುಕತೆಗಳನ್ನು ನಡೆಸಿರುವುದಾಗಿ ಡಾ. ಸಿಂಗ್ ತಿಳಿಸಿದರು.“ಅಧ್ಯಕ್ಷ ಅಬ್ಬಾಸ್ ಮತ್ತು ನಾನು ಭಾರತ-ಫೆಲೆಸ್ತೀನ್ ಭಾಗೀದಾರಿಕೆಗೆ ಪೂರಕವಾಗುವ ನಿಟ್ಟಿನಲ್ಲಿ ಅತ್ಯಂತ ಉಪಯುಕ್ತ ಮಾತುಕತೆಗಳನ್ನು ನಡೆಸಿದೆವು. ಉಭಯ ದೇಶಗಳ ನಡುವಿನ ಭಾಗೀದಾರಿಕೆ ಇತಿಹಾಸದಲ್ಲೇ ಹಾಸು ಹೊಕ್ಕಾಗಿದೆ ಹಾಗೂ ಅದು ನಮ್ಮ ರಾಷ್ಟ್ರೀಯ ತತ್ವಗಳಲ್ಲೇ ಇದೆ” ಎಂದು ಪ್ರಧಾನಿ ಹೇಳಿದರು.

ಫೆಲೆಸ್ತೀನ್ ಹೋರಾಟಕ್ಕೆ ಬೆಂಬಲ ಭಾರತದ ವಿದೇಶ ನೀತಿಯ ಪ್ರಮುಖ ಅಂಶವಾಗಿದೆ ಎಂಬುದರತ್ತ ಬೆಟ್ಟು ಮಾಡಿದ ಪ್ರಧಾನಿ, “ಪೂರ್ವ ಜೆರುಸಲೇಂ ರಾಜಧಾನಿಯಾಗಿ ಸಾರ್ವಭೌಮ, ಸ್ವತಂತ್ರ ಹಾಗೂ ಏಕೀಕೃತ ಫೆಲೆಸ್ತೀನ್ ರಾಷ್ಟ್ರವನ್ನು ನಿರ್ಮಿಸುವ ಫೆಲೆಸ್ತೀನ್‌ನ ಜನರ ಹೋರಾಟಕ್ಕೆ ಭಾರತದ ದೃಢ ಬೆಂಬಲವನ್ನು ತಮ್ಮ ಭೇಟಿಯ ವೇಳೆ ನಾನು ಪುನರುಚ್ಚರಿಸಿದೆ” ಎಂದರು.